د ملکي خدمتونو له قوانینو او مقرراتو څخه د نظارت او کنترول کمېسیون د زابل ولایت له عدليې ریاست څخه لیدنه وکړه
د ملکي خدمتونو له قوانینو او مقرراتو څخه د نظارت او کنترول کمېسیون چې د زابل ولایت د مشرتابه مقام له خوا تعیین شوی د دغه ولایت له عدليې ریاست څخه لیدنه وکړه.
دغه کمېسیون چې په ترکیب کې یې د ولایت د مقام د بشري سرچینو رئیس، د کار او ټولنیزو چارو رئیس، د اداري اصلاحاتو او ملکي خدمتونو آمر او څو تنه مسلکي کارکوونکي په کې شامل دي، له عدليې ریاست څخه لیدنه وکړه او د تېر کال راپورونه، تشکیل، تش بستونه، کاري رژیم، د کارکوونکو حاضري، ستونزې او نورې چارې یې و ارزولې.
یاد کمېسیون د دغه ریاست له کړنو او خدمتونو او له دې امله چې د مراجعینو ستنونزو ته يې په وخت رسیدګي شوي او ورسپارل شوې چارې یې په ښې توګه روانې دي، خوښي څرګنده کړه.
د زابل ولایت د عدلیې رئیس مولوي عبدالوارث خلیل د دغه ریاست د لیدنې له امله له یاد کمېسیون څخه مننه وکړه.
د دغې لیدنې په ترڅ کې، د عدلیې ریاست مسوولینو دوسیو ته د رسیدګۍ، د امارتي ځمکو د غصب د مخنیوي او د غصب شویو ځمکو د استرداد، د معاملاتو لارښوونو، د عریضې لیکوونکو او موټرپلورنځیو ته د جوازلیک د ویشلو او نورو مواردو په برخه کې د دغه ریاست د تېر کال د کړنو راپور له یاد کمېسیون سره شریک کړ.
یاد شوي کمېسیون د عدليې ریاست مسوولینو ته له لایحې او کړنلارې سره سم د ورسپارل شویو چارو ترسره کولو، د امارت د قضایاو اړوند دوسیې ته د ښې رسیدګۍ، حاضرۍ ته د پابندۍ، او خدمتي کارکوونکو ته او د اضافه کاري د حاضرۍ ترتیب، د حاضرۍ د شفاف راپو د ترتیب، د تشو بستونو اعلانولو او نورو برخو کې لازمۍ توصیې وکړې.
