د پکتیکا ولایت د عدليې رییس د دغه ولایت د معاملو د لارښوونو او د موټر پلورونکو له دفترونو څخه نظارت وکړ
د پکتیکا ولایت د عدليې رییس مولوي حیات الله آمین او ورسره مل پلاوي د ربیع الاول میاشتې په ۷ نېټه د دوشنبې په ورځ د دغه ولایت د مرکز ښرنې ښار د معاملو د لارښوونو او موټر پلورونکو دفترونه نظارت او بررسي کړل.
یاد پلاوي د دغه ښار د معاملو د لارښوونو او موټر پلورونکو مسوولینو سره وکتل او د هغوی د فعالیت جوازلیکونه، معاملاتي سندونه (سټې) او د حق العمل پاڼې يې له نږدې نظارت او بررسي کړې.
یاد پلاوي د معاملو د لارښوونو او د موټر پلورونکو د دفترونو مسوولینو ته توصیه وکړه چې پرته له فریب څخه په معاملو کې منځکړیتوب وکړي. دغه راز د معاملو د لارښوونو او موټر پلورونکو هغو دفترونو ته لارښوونه وشوه چې ژر تر ژره د خپل جوازونو پر نوي کولو اقدام وکړي.
د معاملو د لارښوونو او موټرو پلورونکو د دفترونو مسوولانو هر یو په جلا توګه خپلې ستونزې له یاد هیئت سره شریکې کړې او د هیئت له لوري هغوی ته ډاډ ورکړل شو چې د هغوی ستونزو ته به ډیر ژر رسیده ګي وشي.
