د عدلیې وزارت د پالیسۍ او پلان ریاست نوی رئیس معرفي شو
د عدليې وزارت د کارکوونکو د چارو رئیس، محترم مفتي رحمت الله حلیم په یوې ناسته کې د یاد وزارت د پالیسۍ او پلان ریاست نوی رئیس چې د عدلیې وزارت په وړاندیز او د ریاست الوزراء عالي مقام د منظورۍ پر بنسټ ټاکل شوی دی، د دغه ریاست کارکوونکو ته معرفي کړ.
په دې ناسته کې چې د ذوالحجې د میاشتې په ۷مه نېټه د یکشنبې په ورځ د عدلیې وزارت د نورو رئیسانو او د بېلابېلو برخو د مسؤولینو په حضور سره جوړه شوه، محترم مولوي عبدالهادي عاشق الله د دغه وزارت د پالیسۍ او پلان ریاست د نوي رئیس په توګه معرفي شو.
په دې ناسته کې د عدلیې وزارت د قانون جوړونې د چارو عمومي رئیس، محترم مفتي فضل هادي صاحبزاده د پالیسۍ او پلان نوي رئیس د موقف د مبارکۍ ترڅنګ، په امارتي ادارو کې د مسؤولینو تقرر، تغییر او تبديل یو اصل وباله او د مسؤولیتونو پر ترسره کولو او خلکو ته پر صادقانه خدمت کولو یې ټینګار وکړ.
د عدلیې وزارت د پالیسۍ او پلان ریاست نوي رئیس تر دې وړاندې د دغه وزارت د قانون جوړونې د چارو او علمي-حقوقي څېړنو عمومي ریاست د کار او ادارې د قوانینو د رئیس په توګه دنده ترسره کوله.
