د عدلیې وزیر د احتکار پر مخنیوي او د کورونو د کرايې د لوړېدو پر مخنیوي ټینګار وکړ
د اسلامي امارت د عدلیې وزیر، محترم شیخ الحدیث مولوي عبدالحکیم شرعي د روژې د میاشتې په ۱۶مه نېټه د پنجشنبې په ورځ د سوداګرو او د معاملاتو لارښوونو د اتحادیو له مسؤولینو سره په یوې ناسته کې د لومړنیو توکو د احتکار پر مخنیوي او د کورونو د کرايې د لوړېدو پر مخنیوي ټینګار وکړ.
دغه ناسته د یادو اتحادیو د رئیسانو او مسؤولینو او د عدلیې وزارت د مسؤولینو په ګډون ترسره شوه او د عدلیې وزیر په کې څرګنده کړه چې د اتحادیو مسؤولین دې خپل مسؤولیتونه په سمه او جدي توګه ترسره کړي او خلکو ته دې خدمت وکړي.
نوموړي همداراز وویل چې د سوداګرو اتحادیه او د معاملاتو لارښوونې اتحادیه دې د خوراکي لومړنیو توکو د احتکار د مخنیوي او همدارنګه د کورونو د کرايې د لوړېدو د مخنیوي په برخه کې دې خپلو مسؤولیتونو ته جدي پاملرنه وکړي.
محترم شیخ الحدیث مولوي عبدالحکیم شرعي ټینګار وکړ چې یادې اتحادیې دې له اړوندو ادارو، په ځانګړي ډول له ښاروالۍ سره په همغږۍ کې د بیو د کنټرول او تنظیم په برخه کې ګډ کار او اقدام وکړي.
په همدې حال کې د سوداګرو او د معاملاتو لارښوونو د اتحادیو رئیسانو او مسؤولینو ژمنه وکړه چې د بازار د نظم او ټیکاو د ساتنې او د بیو د کنټرول په برخه کې جدي هڅې کوي.
