په ننګرهار ولایت کې د معاملاتو لارښوونې له یو شمېر دفترونو څخه نظارت ترسره شو
د ننګرهار ولایت د عدليې ریاست نظارتي پلاوي، د صفرالمظفر د مياشتې په لومړۍ نېټه د شنبې په ورځ، د دغه ولایت مرکز جلالاباد ښار اړوند په نهمه ناحیه کې د معاملاتو لارښوونې له ۳ دفترونو او په بټي کوټ ولسوالۍ کې له ۶ موټر پلورنځیو څخه نظارت ترسره کړ.
مؤظف نظارتي پلاوي د دغو دفترونو د فعالیت جوازونه، د ثبت کتابونه، د پېر او پلور قانونيتوب، رسمي سټې او یو شمېر نور اړين اسناد بررسي کړل او یو شمېر نيمګرتياوې یې مشخصې کړې.
پلاوي د دغو نیمګړتياوو لرې کولو او د کاري چارو ښه پرمخ وړلو په موخه د هغو متصديانو ته لازمې توصیې وړاندې کړې.
د عدلیې وزارت په مرکز او د عدلیې ریاستونه په ولایتونو کې په دوامداره توګه له اړوندو برخو څخه نظارت ترسره کوي تر څو د غیر قانوني فعالیتونو مخه ونیول شي.
