د تېرې یوې مياشتې په ترڅ کې د کابل ښار د معاملاتو لارښوونې له ۲۱۰ دفترونو څخه نظارت ترسره شوی
د عدلیې وزارت د انسجام عمومي رياست د معاملاتو لارښوونې او د عريضه ليکونکو د چارو رياست نظارتي پلاوي، د روان کال په سلواغې میاشته کې په کابل ښار کې د معاملاتو لارښوونې ۲۱۰ دفترونه نظارت او بررسي كړي دي.
د دغه نظارت په ترڅ کې، د معاملاتو لارښوونې ۱۵ دفترونه د غير قانوني فعاليتونو له امله تړل شوي او د پاتې نورو دفترونو په فعاليتونو کې موجودې ستونزې هم مشخصې او د حل په برخه کې متصديانو یې ته لازمې توصیې وړاندې شوي دي.
همدارنګه، د معاملاتو لارښوونې او د عريضه ليکونکو د چارو رياست د تېرې مياشتې په اوږدو کې ۳۸ غوښتونکو لپاره د معاملاتو لارښوونې د فعالیت نوي جوازونه ويشلي او د فعالیت ۳۰ نور جوازونه یې تمديد کړي دي.
یاد رياست د همدي مودې په اوږدو کې د ۲۵۱ تنو عریضه ليکونکو له فعاليتونو څخه هم نظارت ترسره کړی او په ترڅ کې یې د غيرقانوني فعالیت له امله د ۹ تنو فعاليت درولی دي.
د عدلیې وزارت د انسجام عمومي رياست په مرکز او ولایتي آمریتونه یې په ولایتونو کې په منظم ډول اړوندې برخې نظارت او بررسي کوي تر څو له غیر قانوني فعاليتونو څخه مخنیوی وشي.
