په تېره یوه میاشت کې څه باندې ۳۰ زرو تنو ته حقوقي پوهاوی وړاندې کېدل
د عدلیې وزارت د حقوقي مرستو رياست په مرکز کې او ولایتي آمریتونو يې د روان کال د ربیع الثاني د میاشتې په اوږدو کې، د ۱۷۵برنامو په جوړولو سره ۳۰ زره او ۱۶۹ تنو هېوادوالو ته حقوقي پوهاوی وړاندې کړی.
دا برنامې د مرکز په شمول د هېواد په ۲۵ ولایتونو کې جوړې شوي او په ترڅ کې یې ۵ زره او ۳۷۰ تنو په کابل، ۵ زره او ۲۸۳ تنو په بلخ، ۴ زره او ۷۱۷ تنو په غزني، ۲ زره او ۲۲۸ تنو په بغلان او پاتي نور په بېلابېلو ولایتونو کې له دغو برنامو څخه برخمن شوي دي.
په دغو برنامو کې د عدلیې وزارت د پېژندنې، د اسلامي شریعت د حکمونو په رڼا کې د اولادونو د روزنې، د هېوادوالو حقوقو او مکلفیتونو او د ورته نورو مهمو موضوعاتو په اړه پوهاوی ترسره شوی.
دغه راز په دغو برنامو کې د حقوقي مرستې د څانګې مسلکي غړو په مرکز او ولایتونو کې د ګډونوالو پوښتنو ته ځوابونه ورکړي او د بېلابېلو موضوعاتو په اړه یې هغوی ته حقوقي مشورې وړاندې کړي.
د عدلیې وزارت، د مرکز په ګډون د هېواد په ټولو ولایتونو کې د حقوقي پوهاوي ورکولو برنامې جوړوي او موخه یې دا ده چې خلک د خپلو حقوقو، وجایبو او مکلفیتونو په اړه پوهاوی ترلاسه کړي.
