د ځمکو له غصب څخه د مخنیوي کمېسیون په بېلابېلو ولایتونو کې د څه باندې ۱۶ زره جریبه ځمکو په اړه لازم تصمیم ونیو
د ځمکو له غصب څخه د مخنیوي او د غصب شویو ځمکو د استرداد کمېسیون ناسته د ربیعالاول د میاشتې په ۱۴ مه نېټه د سهشنبې په ورځ د عدلیې وزیر او د یاد کمېسیون رئیس، شیخ الحدیث مولوي عبدالحکیم شرعي په مشرۍ د عدلیې وزارت په مقر کې جوړه شوه.
په دې ناسته کې، د کور او ښار جوړلو وزیر مولوي حمدالله نعماني، د سرحدونو، قومونو او قبایلو وزارت معین مولوي محمد اسماعیل غزنوي، د سترې محکمې استازي شیخ عبدالصمد حقاني، د امارت د قضایاوو عمومي رئیس او د یاد کمېسیون سکرتر مولوي احسان الله وثیق او نور مسؤولینو ګډون درلود.
په دې ناسته کې د ځمکو له غصب څخه د مخنیوي کمېسیون په کابل، کندهار، میدان وردګ، ننګرهار، پکتیکا، پروان، غزني، زابل او غور ولایتونو کې د څه باندې ۱۶ زره جریبه ځمکو موضوعات او دوسیې بررسي کړې.
په یاده ناسته کې د منشي میرغلام، ده کیپک، طلايي، د کندهاریو او دولتزیو ښارګوټو، د شیرپور پروژې او د کابل ښار د ځینو نورو ساحو موضوعاتو په اړه بحث وشو. د کمېسیون غړو پرېکړه وکړه چې ځینې موضوعات یې اختصاصي محکمې ته وسپارل شي او د ځینو نورو په اړه یې لازم اجراآت ترسره شي.
دغه راز یاد کمېسیون په غزني، ننګرهار او میدان وردګ ولایتونو کې د یو شمېر ښارګوټو په اړه هم بحث وکړ او پرېکړه یې وکړه چې د هغو دوسیې د امارتي غصب شویو قضیو ته د رسیدګۍ اختصاصي محکمو ته وسپارل شي.
په دې ناسته کې په نورو ولایتونو کې د امارتي ځمکو د غصب یو شمېر دوسیې هم بررسي شوې او د هغو په اړه لازم تصامیم ونیول شول.
