د ځمکو له غصب څخه د مخنیوي کمېسیون په کابل او څو نورو ولایتونو کې د ځمکو د غصب موضوعات بررسي کړل
ځمکو له غصب څخه د مخنیوي او د غصب شویو ځمکو د استرداد کمېسیون ناسته د صفرالمظفر د میاشتې په ۱۸ نېټه د پنجشنبې په ورځ د عدلیې وزارت سرپرست او د یاد کمېسیون رئیس، شیخ الحدیث مولوي عبدالحکیم شرعي په مشرۍ د عدلیې وزارت په مقر کې جوړه شوه.
په دې ناسته کې، د کرنې، اوبو لګولو او مالدارۍ وزارت سرپرست مولوي عطاء الله عمري، د کور او ښار جوړلو وزارت سرپرست مولوي حمدالله نعماني، د سرحدونو، قومونو او قبایلو وزارت معین مولوي محمد اسماعیل غزنوي، د چارو د ادارې عمومي رئیس شیخ الحدیث مولوي نور الحق انور، د سترې محکمې استازي شیخ عبدالصمد حقاني، د امارت د قضایاوو عمومي رئیس او د یاد کمېسیون سکرتر مولوي احسان الله وثیق او نور مسؤولینو ګډون درلود.
په دې ناسته کې د ځمکو له غصب څخه د مخنیوي کمېسیون د کابل ښار په ۱۷مه ناحیه کې د سعادت ښارګوټي موضوع، په سرپل ولایت کې د ښاروالۍ د پلان د تطبیق څرنګوالي، د ننګرهار ولایت مرکز په جلال آباد ښار کې د ۳۲۹.۹۵ جریبه ځمکې او په کندهار ولایت کې د ځمکو اړوند یوه موضوع بحث او بررسۍ لاندې ونیولې.
په دې ناسته کې د ځمکو له غصب څخه د مخنیوي کمېسیون د یادو موضوعاتو په اړه بحث وکړ او په پایله کې یې د هغو په اړه لازم تصمامیم ونیول.
