د تېرې یوې میاشت په اوږدو کې په میدان وردک ولایت کې د څه باندې ۲۱ زره جریبه امارتي ځمکې استرداد
د ځمکو د غصب د مخنیوي تخنیکي هیئتونو د ۱۴۴۵ هجري قمري کال د شوال د میاشتې په اوږدو کې په میدان وردک، کندز او پنجشیر ولایتونو کې څه باندې ۲۱ زره او ۷۷۸ جریبه امارتي ځمکه له بررسۍ او تثبیت څخه وروسته، استرداد کړې او اړوندو ادارو ته یې تسلیم کړه.
د تېرې یوې میاشتې په ترڅ کې تر ټولو زیاته استرداد شوې ځمکه په میدان وردک ولایت کې موقعیت لري چې ۲۱ زره او ۶۳۸ جریبه ځمکه په کې شامله ده.
دغه راز د ځمکو د غصب د مخنیوی تخنیکي هیئتونو د یادې میاشتې په اوږدو کې کابو ۳۸ زره او ۷۲۰ جریبه امارتي ځمکه د افغانستان په ۱۳ ولایتونو کې تثبیت کړې او ۲۴۷ زره او ۷۰۸ جریبه نوره ځمکه هم په ولایتونو کې تر بررسۍ لاندې نیولې ده.
د امارتي ځمکو د بررسۍ، تثبیت او استرداد بهیر په ټولو ولایتونو کې دوام لري او د غصب شویو زرګونو جریبو امارتي ځمکو دوسیې، د ځمکو د غصب د مخنیوي کمېسیون او په ولایتونو کې د یاد کمېسیون د تخنیکي هیئتونو تر بررسۍ لاندې دي.
