د عدلیې وزیر اهل هنود هېوادوالو ته: ستاسو د ځمکو د غصب موضوع په جدي ډول بررسي کیږي
د عدلیې وزارت سرپرست او د ځمکو د غصب د مخنیوي کمېسیون رئیس شیخ الحدیث مولوي عبدالحکیم شرعي له یو شمېر اهل هنود هېوادوالو سره د یاد وزارت په مقر کې وکتل او له هغوی سره یې د هغوی د غصب شویو ځمکو په اړه خبرې وکړې.
دا کتنه د رمضان د میاشتې په ۳ نېټه د چهارشنبې په ورځ ترسره شوه او د عدلیې وزارت سرپرست په کې وویل چې باید د خپلو غصب شویو ځمکو سندونه، قبالې، موقعیت او اندازه د ځمکو د غصب د مخنیوي او د غصب شویو ځمکو د استرداد کمېسیون سره شریکې کړي ترڅو یاد کمېسیون موضوع بررسي کړي.
اهل هنود هېوادوالو هم د عدلیې وزارت سرپرست او د ځمکو د غصب د مخنیوي کمېسیون له رئیس څخه د مننې ترڅنګ وویل چې د هغوی ځمکې په ننګرهار، خوست، لوګر، پروان، غزني، بلخ، بغلان، لغمان او یو شمېر نورو ولایتونو کې غصب شوي دي.
هغوی وویل چې د خپلو غصب شویو ځمکو مشخصات به د «درمسال» له لارې د یاد کمېسیون تر سرلیک لاندې واستوي او د عدلیې وزارت سرپرست هم ډاډ ورکړ چې کمېسیون او ولایتي تخنیکي هیئتونه به يې، دا موضوع په بشپړ جدیت او دقت سره بررسي کړي.
د ځمکو د غصب د مخنیوي کمېسیون له هغو اشخاصو او افرادو چې د اهل هنود هېوادوالو ځمکې یې غصب کړي غوښتنه کوي چې د هغوی ځمکې بېرته ورکړي؛ په غیر له دې به کمېسیون له هغوی سره چلند وکړي.
