د عدلیې وزارت د دریو مرکزي ریاستونو د رئیسانو معرفي
د عدلیې وزارت مسلکي معین شیخ الحدیث مولوي عبدالکریم حیدر د یو لړ مراسمو په ترڅ کې د یاد وزارت د دریو مرکزي ریاستونو رئیسان چې د یاد وزارت د وړاندیز او د ریاست الوزرا د عالي مقام د منظورۍ په اساس تعیین شوي دي، د یادو ریاستونو کارمندانو ته وروپېژندل.
په دغو مراسمو کې چې د شعبان د میاشتې په ۶ نېټه د شنبې په ورځ د عدلیې وزارت د بېلابېلو برخو رئیسانو او مسؤولینو په حضور سره پر ځای شوو، د مدافع وکیلانو پخوانی رئیس مولوي سید حبیب الحبیب د مالي او اداري رئیس په حیث، د مالي او اداري پخوانی رئیس مولوي عبدالقادر شریفي د پالیسۍ او پلان رئیس په حیث او د حقوقي مرستو پخوانی رئیس مولوي رحمت الله حقاني د یاد وزارت د مدافع وکیلانو د رئیس په حیث معرفي شول.
په دغو مراسمو کې د عدلیې وزارت مسلکي معین د خپلو خبرو په ترڅ کې، یادو رئیسانو ته د نویو مسؤولیتونو د مبارکۍ ویلو ترڅنګ له هغوی څخه وغوښتل چې د مسؤولیتونو په ترسره کولو او خلکو ته د خدمت په برخه کې له هیڅ ډول هلو ځلو ډډه و نه کړي.
نوموړي زیاته کړه چې تغییر او بدلون په اداره کې د مشرتابه او مشرانو د لزوم دید په اساس صورت مومي او ټینګار یې وکړ چې د مسؤولیت ترسره کول باید د مادیاتو له امله نه وي؛ بلکې موخه یې د الله تعالی د رضا ترلاسه کول او خلکو ته خدمت وي.
له بلې خوا په یادو مراسمو کې د عدلیې وزارت د بشري سرچینو رئیس مولوي رحمت الله حلیم، په نظام او اداره کې تغییر او بدلون او عزل او نصب یو اصل وباله او نویو رئیسانو لپاره یې د بریالیتوب هیله وکړه.
په یادو مراسمو کې د عدلیې وزارت د دریو مرکزي ریاستونو نویو رئیسانو هم خبرې وکړې او د وزارت له رهبرۍ یې د قدردانۍ ترڅنګ، ژمنه وکړه چې ورسپارل شوي مسؤولیتونه به په ښه توګه پر مخ یوسي.
