په کندز ولایت کې څه باندې د ۱۵۰۰ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د جمادي الثاني د میاشتې په ۱۱ نېټه د دوشنبې په ورځ د دغه هیئت د رئیس او غړو په حضور سره جوړه شوه او د مرکز په عسقلان ساحه کې د ۱۰۰ جریبه ځمکې، د امام صاحب ولسوالۍ د مراد شیخ ساحې د ۲۸ جریبه ځمکې او د امام صاحب ولسوالۍ د برزنګي ساحې د ۳۰۶۵ جریبه ځمکې دوسیې په کې بحث او بررسۍ لاندې ونیول شوې.
په یاده ناسته کې له تخنیکي هیئت څخه یو ټیم د عسقلان په ساحه کې د ۱۰۰ جریبه ځمکې او د مراد شیخ ساحې د ۲۸ جریبه ځمکې د سندونو د تطبیق، سکیچ، کروکي او د کوردینات اخیستلو په مقصد توظیف شو ترڅو له لازمو اجراآتو څخه وروسته خپل راپو تخنیکي هیئت ته وړاندې کړي.
یاد هیئت د امام صاحب ولسوالۍ د برزنګي ساحې د ۳۰۶۵ جریبه امارتي ساحې دوسیې په اړه چې د هغې ۵۵۰ جریبه د خلکو تر اجارې لاندې ده او زر جریبه يې د دوو کرنیزو شرکتونو تر اجارې لاندې ده، پریکړه وکړه چې د دوو کرنیزو شرکتونو تر اجارې لاندې ځمکه د شخړې د مخنیوي په موخه ځايي خلکو ته چې بزګر او کروندګر دي، په اجاره ورکړل شي. هیئت پاتې ۱۵۱۵ جریبه ځمکه استرداد کړه.
