په بادغیس ولایت کې د ۵۰ جریبه غصب شوې امارتي ځمکې استرداد
د بادغیس ولایت د ځمکو د غصب د مخنیوي د تخنیکي هیئت ناسته د جمادي الثاني د میاشتې په ۱۱ نېټې د دوشنبې په ورځ د دغه هیئت د رئیس او غړو په حضور سره جوړه شوه.
په یاده ناسته کې، د ځمکو د غصب اړوند یو شمېر دوسیې او د مراجعینو په واسطې یو شمېر وړاندې شوې عریضې، سندونه او مدارک بحث او بررسۍ لاندې ونیول شوو او په دې هکله لازم تصمیمونه ونیول شول.
په دې ناسته کې، یاد شوي هیئت د یاد ولایت د مقر ولسوالۍ په خاک کاکړ ساحه کې کابو ۵۰ جریبه للمي ځمکه چې د دغې ساحې د رحمت زیو او یوسف زیو قومونو تر دعوا لاندې وه، د یادې ساحې د امارتي توب په اساس د دعوا د لورو له اقرار څخه وروسته، استرداد کړه او له هغوی څخه یې ژمنه واخیسته.
