د کندز ولایت په علي آباد ولسوالۍ کې د ۸۶ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د ربیع الثاني د میاشتې په ۸ نېټې د دوشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې، د قلعه ذال ولسوالۍ د ظلم آباد ساحې د ۶۲۵ جریبه ځمکې دوسیه او د رئیس آباد ښارګوټي دوسیه بحث او بررسۍ لاندې ونیول شوې او یاده ځمکه امارتي تثبیت شوه. هیئت لارښوونه وکړه چې یادې شوې دوسیې مرکزي کمېسیون ته واستول شي.
دغه راز په یاده ناسته کې د قلعه ذال ولسوالۍ د صالح آباد او تربوز ګذر ساحو د ۳۰ جریبه ځمکې دوسیه بحث او بررسۍ لاندې ونیول شوه او له تخنیکي هیئت څخه یو ټیم د یادو ساحو د بررسۍ په منظور توظیف شو ترڅو ساحې له نږدې بررسي کړي او راپور یې وړاندې کړي.
وروسته د تخنیکي هیئت غړي د علي آباد ولسوالۍ میر شیخ ساحې ته روان شو او په دغې ساحه کې ۸۶ جریبه ځمکه له نږدې بررسي کړه او یاده شوې ځمکه یې د هغې د متصرفینو له اقرار څخه وروسته استرداد کړه. دغه راز هیئت لارښوونه وکړه چې د یادې ځمکې د اجارې ورکولو بهیر هم له پړاوونو تېر شي.
ورپسې یاد هیئت د دغې ولسوالۍ لاله میدان ساحې ته ولاړ او د ساحې په بررسۍ سره، په دغې ساحې کې کابو ۹۱ جریبه ځمکه امارتي تثبیت کړه.
