په کندز ولایت کې څه دپاسه د ۳ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د ربیع الاول د میاشتې په ۳ نېټې د دوشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې، د قلعه ذال ولسوالۍ د ګل تپې د توبره کش ساحې د ۳ جریبه او ۱ بسوې ځمکې دوسیه له بررسۍ او د هغې له غیرشرعي متصرف څخه د اعتراف له اخیستلو وروسته امارتي تثبیت او استرداد شوه او دغه راز د یادې ولسوالۍ د ګل تپې په چهار ساحې کې ۹ جریبه نوره ځمکه امارتي تثبیت شوه او د څېړنو بشپړولو په منظور لازمې لارښوونې وشوې.
په یاده ناسته کې، د کلباد ولسوالۍ په غرو سوم ساحې کې د څړځای د ۱۰۰ جریبه ځمکې دوسیه هم بحث او بررسۍ لاندې ونیول شوه او د څېړنو د بشپړولو په اړه د دغه هیئت سکرتریت ته لازمې لارښوونې وشوې.
وروسته یاد هیئت د دغه ولایت د حوزوي روغتون انګړ ته ولاړ او د یاد روغتون په انګړ کې د درملتون د جوړولو له ساحې څخه له نږدې لیدنه وکړه او لارښوونه یې وکړه چې د اړوندو مراجعو له لارې څېړنې ترسره شي.
