په کندز ولایت کې د ۱۹۵۸ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت رئیس او غړو د صفرالمظفر د میاشتې په ۱۱ نېټه د دوشنبې په ورځ د دغه ولایت د امام صاحب ولسوالۍ ته سفر وکړ او ۱۹۵۸ جریبه امارتي ځمکه یې استرداد کړه.
په دغه سفر کې یاد هیئت د دغې ولسوالۍ د شورتنک بابوس ساحې له ۱۹۱۸ جریبه ځمکې څخه چې وړاندې امارتي تثبیت شوې وه، لیدنه وکړه او د یادې ساحې متصرفین يې وپوهول چې دغه ځمکه امارتي ده. دغه راز یاد هیئت د دغې ساحې متصرفینو ته ډاډ ورکړ چې یاده شوې ځمکه به له کړنلارې سره سم هغوی ته په اجاره ورکړل شي.
په همدې توګه یاد هیئت د امام صاحب د ولسوالۍ د قلم ګذر ساحې د ۴۰ جریبه ځمکې دوسیه چې وړاندې امارتي تثبیت شوې وه، ارزونې او بررسۍ لاندې ونیوله او د هغې د متصرفینو له لیکل شوي اقرار لیک اخیستلو څخه وروسته یې، یاده ځمکه استرداد کړه او اړوندو مسؤلینو ته یې لارښوونه وکړه چې د هغې د اجارې ورکولو د پړاونو تېرولو بهیر د هغې له غیر شرعي متصرفینو سره د یو کال لپاره بشپړ کړي.
دغه راز یاد هیئت د جلي کول ساحې د ۹۲۷ جریبه ځمکې د اجارې ورکولو ستونزه د یادې ساحې د قراردادي او اوسیدونکو ترمنځ حل او فصل کړه.
