د کابل ولایت د امارت د قضایاو نوی رئیس معرفي شو
د کابل ولایت د امارت د قضایاو نوی رئیس چې د عدلیې وزارت د وړاندیز او د ریاست الوزراء د عالي مقام د منظورۍ په اساس په دغه پست کې مقرر شوی د یاد ریاست کارمندانو ته معرفي شو.
په هغو مراسمو کې چې په همدې مناسبت د ۱۴۴۵ هجري قمري کال د محرم الحرام د میاشتې په ۲۸ نېټه د دوشنبې په ورځ د یاد ریاست په مقر کې جوړه شوې وه، د عدلیې وزارت د بشري سرچینو رئیس مولوي رحمت الله حلیم او د عدلیې وزارت د حقوقي مرستو رئیس مولوی رحمت الله حقاني برخه واخیسته او د سترې محکمې د حقوقو مخکنی لوی رئیس مولوي عبدالله کالف، د کابل ولایت د امارت د قضایاو د رئیس په حیث د دغه ریاست کارمندانو ته معرفي کړ.
په دغو مراسمو کې، د عدلیې وزارت د بشري سرچینو رئیس او د حقوقي مرستو رئیس د موضوع په تړاو خبرې وکړې او په اداره کې تغییر او تبدیل یو اصل وباله. هغوی د کابل ولایت د امارت د قضایاو رئیس ته د نوي پست مبارکي وویله او نوموړي ته یې د لوی څښتن تعالی له دربار څخه د لازیاتو بریاوو هیله وکړه.
د کابل ولایت د امارت د قضایاو نوي رئیس د دغه وزارت د مشرتابه مقام له اعتماد څخه مننه او قدرداني څرګنده کړه او ژمنه يې وکړه چې خلکو ته به د خدمت په لار کې له هیڅ ډول هڅو څخه ډډه و نه کړي.
