د پکتیا ولایت تخنیکي هیئت د ډنډپټان ولسوالۍ له قومي مشرانو او مخورو سره وکتل
د پکتیا ولایت د ځمکو د غصب د مخنیوي تخنیکي هیئت د شوال میاشت په ۱۸ نېټه د دوشنبې په ورځ د دغه ولایت ډنډپټان ولسوالۍ ته سفر وکړ او د یادې ولسوالۍ د خروټو او قیمتۍ منګل قومونو له مشرانو او مخورو سره وکتل.
یادو شویو قومونو له کلنو راهیسۍ د غره، اوبو، لرګیو او څلورو قطعو ممنوعه ملکیت په اړه په خپلو کې شخړه لري او د هغوی دوسیه د سلسله مراتبو په اساس دغه هیئت ته راجع شوې ده.
په دغې لیدنه کې، د تخنیکي هیئت رئیس د یادې ولسوالۍ له قومي مشرانو سره د دغه سفر موخه شریکه کړه او یادو قومي مشرانو هم د شخړې لاندې موضوعاتو په اړه تخنیکي هیئت ته معلومات وړاندې کړل.
د بررسیو په پایله کې مشخصه شوه چې دغه قضیه دوه جزائي او حقوقي برخې لري. یاد هیئت د دغې قضیې حقوقي برخې د بررسۍ له پاره د شخړې لورو ته استعلام ورکړ او د یادې قضيې د جزائي برخې د بررسۍ په اړه یې هم هغوی ته معلومات ورکړل.
