د دایکندي ولایت د تخنیکي هیئت ناسته جوړه شوه
د دایکندي ولایت د ځمکو د غصب د مخنیوي د تخنیکي هیئت ناسته د شوال میاشت په ۱۷ نېټه د یکشنبې په ورځ د دغه هیئت د رئیس او غړو په حضور سره جوړه شوه او لومړی د تېرې ناستې له پریکړو څخه بیاکتنه وشوه.
په دغې ناسته کې یو هیئت تعیین شو چې د اوسیدونکو لخوا د معرفي شوي وکیل په مرسته، د ماسټر پلان په داخل کې قطعې بررسي او جریب بندي کړي. دغه راز، په زنبور خان کې د معلمینو ښارګوټي د دوسیې په تړاو پریکړه وشوه چې مدعی شخص ته خبر ورکړل شي چې د دوو ورځو په اوږدو کې حاضر شي او خپل سندونه وړاندې کړي.
د ښاروالۍ د ریاست د استوګنې او سوداګرۍ ځمکو په تړاو چې د اسلامي امارت د بریالیتوب په پیل کې ویشل شوي، پریکړه وشوه چې له هغو افرادو او اشخاصو څخه چې ځمکې ورته ویشل شوي، د بانکي آویز د څرنګوالي او د ویشل شویو نمرو د بيې د پیسو ورکولو په اړه، معلومات وغوښتل شي.
دغه راز پریکړه وشوه چې د مرکزي کمېسیون له لارښوونې سره سم د دغه هیئت ربعوار او کلنی پلان هم ترتیب شي.
