د کندز ولایت تخنیکي هیئت ددغه ولایت د کرنې ریاست د ۱۵۳ جریبه ځمکې موضوع بررسي کړه
د کندز ولایت د ځمکو د غصب د مخنیوي تخنیکی هیئت د ۱۴۴۴ هجري قمري کال د روژې میاشت په ۵ نېټه د دوشنبې په ورځ، د کرنې ریاست د ۱۵۳ جریبه ځمکې او ددغه ولایت د زندانو ریاست د ځمکو موضوع بررسي کړه او له اړوندو متصرفینو او مسوولینو سره یې وکتل.
یاد هیئت، د کرنې ریاست د ۱۵۳ جریبه میکانیزه ځمکې د غصب موضوع چې د مخکني نظام د محکمو په حکم امارتي تثبیت شوې خو د خلکو لخوا د جعلي سندونو په وسیله پلورل شوې بررسي کړه. اوس مهال ۳۰۰ کورونه پرې جوړ شوي او خلک په کې ژوند کوي.
یاد هیئت د موضوع د سندونو او سوابقو له بررسۍ څخه وروسته د یادې ساحې له مشرانو سره وکتل. هغوی وویل چې موږ ساحې غصب کړي نه دي بلکه د شرعي سندونو پر اساس پیرودلي دي. هغوی له تخنیکي هیئت څخه د عدالت د طبیق غوښتونکي شول.
یاد شوي هیئت ددغې ساحې مشرانو ته د عدالت او شریعت له تطبیق څخه ډاډ ورکړ او ویې ویل چې یاده شوې دوسیه به له اجراآتو څخه وروسته د تصمیم نیولو له پاره مرکزي کمېسیون ته واستول شي.
دغه راز تخنیکي هیئت د دغه ولایت د زندانو ریاست ته ولاړ او د هغه له مسوولینو سره یې د کندز ښار په لومړۍ ناحیه کې ددغې ادارې د ځمکې د غصب په اړه خبرې وکړې. د زندان مسوولینو وویل چې ددغې ادارې ټول سندونه او سوابق د وروستیو بدلونونو په ترڅ کې له منځه تللي او خپل سندونه له مرکز څخه غواړي.
تخنیکي هیئت، یو تن چې زندان ته څیرمه ملکیت لري احضار کړ او له نوموړي څخه يې د هغه د ملکیت په اړه معلومات وغوښتل. یاد شوي هیئت د زندان مسوولینو ته د موضوع د هر اړخیزې بررسۍ څخه ډاډ ورکړ.
