د کندز ولایت د ځمکو د غصب د مخنیوي د تخنیکي هیئت ناسته جوړه شوه
د کندز ولایت د ځمکو د غصب د مخنیوي د تخنیکي هیئت ناسته د ۱۴۴۴ هجري قمري کال د روژې د میاشت په ۴ نېټه د یکشنبې په ورځ ددغه هیئت د رئیس اوغړو په حضور سره جوړه شوه او له بېلابېلو ادارو څخه استول شوي موضوعات او دوسیې په کې بررسي شوې.
په دغې ناسته کې، د ۲۴۷۰ جریبه ځمکې د لیږد موضوع چې مخکني نظام کې د ټاکنو کمېسیون ته لیږدول شوې وه او اسلامي امارت د کمېسیون په لغو کولو سره، دغه ځمکه د کندز د بهرنیو چارو ریاست ته د ښاروالۍ لخوا لیږدولې ده، بررسي شوه او دغې برخه کې لازم تصمیمونه ونیول شول.
دغه راز په یاده ناسته کې په امام صاحب، قلعه ذال او علي آباد ولسوالیو کې د ۱۵۰ جریبه ځمکې په تړاو د څلورو ټوکو دوسیو موضوع چې د سترې محکمې لخوا د اجراآتو په غرض دغه تخنیکي هیئت ته استول شوې وه، بررسۍ لاندې ونیول شوه او په اړه یې لازم تصمیمونه ونیول شول.
دغه راز د کندزو ولایت په قلعه ذال او امام صاحب ولسوالیو کې د خوړو د ادارې د استازولۍ د غصب شویو ځمکو موضوع د اړوندې ادارې د استازې په حضور سره بحث او بررسۍ لاندې ونیول شوه او ددغه هیئت سکرتریت ته لارښوونه وشوه ترڅو دغې برخه کې هر اړخیزې څیړنې وکړي او یاد شوي هیئت ته یې راپور وړاندې کړي.
