د لغمان ولایت د تخنیکي هیئت ناسته جوړه شوه

د لغمان ولایت د تخنیکي هیئت ناسته ددغه هیئت د رئیس او غړو په حضور سره جوړه شوه او پکې د ښار، ښارګوټو، صنعتي پارکوونو او د هستوګنې ساحو ته نږدې د هیئت د لازیات کار په اړه  ټینګار وشو.

یاد شوي هیئت په 2R ساحه کې د ۲۹۲ جریبه غصب شوې ځمکې دوسیه د ټولو ضروري مواردو ځای پرځای کولو سره وروستۍ کړې او مرکزي کمېسیون ته یې د استولو له پاره برابره کړه.

دغه راز یاد هیئت د کرنج ساحې له اوسیدونکو سره چې د هدیرې پر ساحې شخړه لري، لیدنه وکړه. یاد هيئت خپله پریکړه هغوی ته واوروله او ویې ویل چې دغه پریکړه وروستۍ ده او د تطبیق له پاره امنیه قوماندانۍ ته هم استول شوې ده.

دغه هیئت د سرخکان ساحې د ۱۷۵ جریبه ځمکې له غاصبینو سره هم وکتل او د هغوی سندونه یې ترلاسه کړل. دغه راز هیئت د پروايي ساحې د ۱۱۲ جریبه ځمکې له اجاره دارانو سره وکتل او د هغوی ستونزې له هغې جملې څخه د سیمې د خلکو لخوا ګواښول يې واوریدل. یاد هیئت هغوی ته ډاډ ورکړ چې دغې برخه کې به لازم تصمیمونه ونیول شي.