د جوزجان، بدخشان او ارزګان ولایتونو د تخنیکي هیئتونو ناستې جوړې شوې
د جوزجان، بدخشان او ارزګان ولایتونو د ځمکې د غصب د مخنیوي تخنیکي هیئتونو ناستې ددغو هيئتونو د رییسانو او غړو په حضور سره جوړې شوې او دغو ولایتونو کې د امارتي ځمکو د غصب د مخنیوي په برخه کې، بحث وشو او دغې برخه کې لازم تصمیمونه ونیول شول.
د جوزجان ولایت د تخنیکي هیئت په ناسته کې، ددغه هیئت کاري کړنلاره جوړه شوه او دغه کړنلاره مرکزي کمېسیون ته هم واستول شوه.
دغه راز په یاده ناسته کې د خواجه دو کوه او قوشتپه ولسوالیو د عامه مرعی ځمکو د بررسۍ په اړه بحث وشو او پریکړه وشوه چې هیئت راتلونکې ورځ ساحې ته ولاړ شي او ساحه له نږدې بررسي کړي.
په همدې حال کې د بدخشان ولایت د تخنیکي هیئت په ناسته کې، ددغه هیئت رییس کابل ته د خپل د سفر راپور د یاد هیئت غړو ته وړاندې کړ.
دغې ناسته کې، یاد شوي هیئت د تثبیت شوو ساحو پر جدي مراقبت او نظارت ټینګار وکړ او د بهارک ولسوالۍ په دشت کوکچه حصار کې د سپین زر شرکت د ۱۶۳۹ جریبه غصب شوې ځمکې پر ملکیت د عملي کار د پیل په اړه تصمیم ونیو. دغه راز هیئت د راتلونکې اوونۍ له پاره یو کاري پلان جوړ کړ.
پر دې سربېره د ارزګان ولایت د تخنیکي هیئت ناسته هم جوړه شوه او یاد هیئت د ترینکوټ اړوند له سینانو ساحې څخه لیدنه وکړه.
دغه راز یاد هیئت د کوچکین له هدیرې او ۳ ناحیې کې له یو انګړ څخه لیدنه وکړه.
