د عدلیې وزارت له سرپرست سره د افغانستان د طبي شورا د سرپرست کتنه
د افغانستان د طبي شورا سرپرست ډاکټر عثمان ګلزي او د هغه مل پلاوي د جمادي الاول میاشت په ۲۴ نېټه د یکشنبې په ورځ د اسلامي امارت د عدلیې وزارت له سرپرست شیخ الحدیث مولوي عبدالحکیم شرعي سره ددغه وزارت په مقر کې وکتل او خبرې وکړې.
په دغې کتنه کې، دواړو لورو د قوانینو، مقرراتو او اصول جوړونې په اړه بحث او خبرې وکړې.
د عدليې وزارت سرپرست په دغې کتنه کې، په افغانستان کې د غیر معیاري طبابت او بې کیفیته درملو استعمال په اړه خپله اندېښنه څرګنده کړه او د طبي شورا مسوولینو ته يې د اخلاص او خلکو ته ښو خدمتونو په وړاندې کولو سپارښتنه وکړه. دغه راز نوموړي په افغانستان کې د طبابت پر معیاري کولو ټینګار وکړ او زیاته یې کړه چې د طبابت موخه د روغتیایي خدمتونو وړاندې کول او د ناروغیو درملنه ده.
د عدليې وزارت سرپرست د اصول جوړولو په اړه د امیرالمومنین حفظه الله د فرمان په اړه معلومات ورکړل او دغه فرمان کې موجوده مادې يې د طبي شورا مسوولینو له پاره تشریح کړې. نوموړي د طبي شورا مسوولینو ته سپارښتنه وکړه چې په طبي قوانینو کې مجازاتو او مکافاتو ته زیاته توجو وکړي او اشخاصو له پاره د جواز په ورکولو کې له بشپړ احتیاط څخه کار واخلي.
دغه راز نوموړي زیاته کړه چې مسوولیت پېژندنه یو مهم اصل دی او موږ باید خپل مسوولیتونه وپېژنو او د هغو په رڼا کې خپل مسوولیتونه او کارونه مخ ته یوسو. هغه زیاته کړه چې سفارش طبابت کې خیانت دی او باید هغه چا ته د فعالیت جواز ورکړل شي چې اهلیت یې ولري.
په دغې لیدنه کې، د طبي شورا رییس وویل چې د قوانینو د جوړولو برخه کې د طبي شورا بورډ ته دنده سپارل شوې ترڅو دغې برخه کې د اړوندو قوانینو مسودې په بشپړ دقت او څېړنې سره جوړې کړي او د علماو د نظر له تېرلو څخه یې وروسته عدليې وزارت ته واستوي.
د طبي شورا مسوولین له عدلیې وزارت څخه د همکارۍ غوښتونکي شول او ژمنه یې وکړه چې دغه شورا به خپل خدمتونه د اسلامي شریعت او د اسلامي امارت د نافذ شوو قوانینو په چوکاټ کې وړاندې کړي.
