د سرپل عدلیې ریاست څخه د عدلیې وزارت د استول شوي هیئت نظارت او لیدنه
د عدلیې وزارت استول شوي هیئت ددغه وزارت د حقوقي مساعدتونو لوی رییس مولوي رحمت الله حقاني په مشرۍ د شمال ولایتونو د عدلیې له ریاستونو څخه د لیدنو په لړ کې، د ربیع الثاني میاشت په ۲۰ نېټه د سه شنبې په ورځ د سرپل ولایت له عدلیې ریاست څخه لیدنه وکړه.
یاده هیئت په دغې لیدنه کې د سرپل ولایت د عدلیې له رییس او ددغه ریاست له کارکوونکو سره وکتل او په دغه ریاست کې یې د اجرااتو څرنګوالی نظارت او بررسي کړ. دغه راز یاد هیئت ددغه ریاست د کارکوونکو ستونزې واوریدې او د هغو د حل په منظور یې هغوی ته ډاډ ورکړ.
یاد هیئت په دغه ولایت کې د عدلیې ریاست او نورو اړوندو ادارو ترمنځ د همغږۍ او د عدلیې ریاست د ستونزو شریکولو په منظور د سرپل ولایت د والي له مرستیال او په دغه ولایت کې د سیمه ییزو ریاستونو له رییسانو سره وکتل.
په دغې کتنه کې چې د سرپل ولایت په مقام کې ترسره شوه، ددغه هیئت رییس مولوي رحمت الله حقاني د تېرو ۲۰ کلنو مقدس جهاد په اړه خبرې وکړې او د هېواد په کچه یې د اسلامي امارت د مقدسو موخو په اړه معلومات وړاندې کړل.
هغه د عدلیې ریاست ستونزې ددغه ولایت د والي له مرستیال سره شریکې کړې او له عدلیې ریاست سره یې د ادارو د زیاتې همکارۍ او همغږۍ غوښتنه وکړه.
د سرپل ولایت د مقام مالي او اداري مرستیال الحاج ملا محمد نادر حقجو یاد هیئت ته ښه راغلاست وویل او د عدليې ریاست د ستونزو د حل په برخه کې یې د هر اړخیزې همکارۍ ژمنه وکړه.
