د کنړ ولایت د اصلاح مرکز د محبوسینو له پاره د پوهاوي ورکوونې د برنامې جوړیدل
د کنړ ولایت د عدلیې ریاست د حقوقي مساعدتونو امر او ددغه ریاست د عامه پوهاوي مبلغ د ربیع الثاني میاشت په ۱۸ نېټه د یکشنبې په ورځ ددغه ولایت د اصلاح مرکز له محبوسینو سره وکتل.
د حقوقي مساعدتونو امر په دغې لیدنه کې د دغه ولایت د اصلاح مرکز محبوسینو له پاره د نشه يي توکو د استعمال د ضررونو په اړه معلومات وړاندې کړل او ویې ویل چې د نشه يي توکو استعمال انسان ته له جسمي، دیني او معنوي پلوه زیان رسوي او د الله تعالی د نافرمانۍ او د شرعي امرونو د ضایع کېدو لامل ګرځي.
هغه زیاته کړه چې د نشه یي توکو استعمال د غلا، جګړې، قتل د جرمونو زیاتېدو، د بیکارۍ او په ټولنه کې د وروسته پاتې کېدو لامل هم ګرځي. هغه وویل په همدغه اساس خلکو ته د نشه يي توکو د استعمال په اړه پوهاوی ورکوي او د هغو له استعمال څخه مخنیوی کوي.
دغه راز هغه وویل چې د افغانستان اسلامي امارت هڅه کوي چې د نشه يي توکو د استعمال له زیانونو څخه ټولنه خبر تر لاسه کړي او د خلکو په مرسته د هغه له پېرلو، پلورلو او استعمال څخه مخنیوی وکړي ترڅو خلک له بدبختۍ څخه وژغورل شي.
