د معاملو د لارښوونې او د عریضې لیکنې د جواز له صادرولو څخه د ۲۰ میلیونو افغانیو عوایدو راټولول
د اسلامي امارت د عدلیې وزارت د انسجام لوی ریاست د تېرو ۹ میاشتو په بهیر کې ۱ زرو ۷۳۴ تنو غوښتنکو ته د معاملو د لارښوونې او د عریضې د لیکنې د فعالیت جواز لیکونه صادر کړي چې له دې لارې یې تقریباً د ۲۰ میلیونه افغانۍ عواید راټول کړي دي .
په دې موده کې د معاملو د لارښوونې ۱ زرو ۲۱۱ دفترو ته جوازلیکونه صادر شوی چې له دې جملې څخه ۳۷۵ جواز لیکونه تمدېدي او ۸۳۶ یې نوي جواز لیکونه دي.
همدا راز دغه ریاست ۵۲۳ تنو نورو غوښتنکو ته د عریضې لیکنې د فعالیت جواز لیکونه صادر کړي چې له دې جملې څخه ۳۳۱ جواز لیکونه نوي او ۱۹۲ نور یې تمدېدي دي.
هغه ټول عواید چې له دې شمېر جواز لیکونو او د سرغړونو په دلیل د معاملې د لارښوونې څخه تر لاسه شوي دي ۱۹ میلیونه او ۹۹۲ زره او ۴۴۱ افغانۍ دي چې د اسلامي امارت خزانې ته تحویلې شوې.
په همدې ډول د انسجام ریاست د بررسۍ پلاوي په دې موده کې د معاملې د لارښوونې ۷۵۰ دفترونه نظارت او بررسي کړل چې له دې څخه ۲۲۵ دفترونه د غیر قانوني فعالیت په دلیل د پلاوي له لورې وټړل شول.
