د ځمکې د شخړو د حل د کمېسیون دوه یمه غونډه جوړه شوه
د ځمکې د شخړو د حل د کمېسیون دوه یمه غونډه د ۱۴۰۱ کال د وري د میاشتې په ۳۰ نېټه د سه شنبې په ورځ د افغانستان اسلامي امارت د عدلیې وزارت د سرپرست شیخ الحدیث مولوي صاحب عبدالحکیم شرعي په مشرۍ جوړه شوه.
په دې غونډه کې د کمېسیون نورو غړو هر یوه د ښار جوړولو او اراضۍ وزارت سرپرست مولوي حمدالله نعماني، د لويې څارنوالۍ سرپرست مولوي شمسالدین پهلوان، د کرنې، اوبو لګولو او مالدارۍ وزارت سرپرست مولوي عبدالرحمن راشد، د کار او ټولنیزو چارو وزارت سرپرست ملا عبدالولي څارنوال او د اسلامي امارت د چارو د ادارې د انسجام مرستیال شیخ نورالحق انور برخه لرله.
د کمېسیون غړو په دې غونډه کې په هغې طرحې باندې چې د عدلیې وزارت د قانون جوړونې لخوا د دولتي ځمکو له غصب څخه د مخنیوي لپاره برابره شوې بحث وکړ او نظر یې سره شریک کړ او خپل اصلاحي نظرونه یې د دې طرحې د بډاینې په منظور مطرح کړل.
په دې غونډه کې پرېکړه وشوه ترڅو یاده طرحه د مطرح شویو اصلاحي وړاندیزونو په پام کې نیولو سره اصلاح او د کمېسیون راتلونکې غوندې ته دې وړاندې شي.
د ځمکې د شخړو د حل کمېسیون د عالي قدر امیرالمؤمنین د لارښوونې پر بنسټ د کابینې په هغې فوق العاده غونډه کې چې په قندهار ولایت کې جوړه شوې وه، د عدلیې وزارت د سرپرست شیخ الحدیث مولوي صاحب عبدالحکیم شرعي په مشرۍ او د اړوندو ادارو په غړیتوب جوړ شوی دی تر څو د دولتي ځمکو له غصب څخه مخنیوۍ وکړي او هم د ځمکې د شخړو د حل په برخه کې اقدام وکړي.
