د عدلیې وزارت د مرکزي رئیسانو اداري غونډه جوړه شوه
د عدلیې وزارت د مرکزي رئیسانو اداري غونډه د دې وزارت د مسلکي معین، شیخ عبدالکریم حیدر په مشرئ د ۱۴۰۱ کال د وري د میاشتي په ۲۸ نېټه د یکشنبې په ورځ جوړه شوه.
په دې غونډه کې د شته ستونزو او د حقوقي مرستو د لوی ریاست او د استخباراتو ریاست تر منځ د زیاتې همغږۍ، د قندهار او هلمند د ولایتونو له محکمو سره د دغو ولایتونو د حقوقي مرستو د آمریتونو او د حقوقو د آمریتونو تر منځ د شته ستونزو، په ولایتونو کې د مامورینو د معاشونو او د ترانسپورت د موضوع او د عدلیې وزارت د مرکزي رئیسانو د حاضرۍ د موضوع په باره کې خبرې وشوې.
په دې غونډه کې د شته ستونزو د حل او له مدافعو وکیلانو سره د استخباراتو ریاست د همکارۍ په منظور پرېکړه وشوه چې د استخباراتو ریاست سره به خبری شریکی کړو ترڅو هم غږي لاهم زیاته شي.
دغه راز پرېکړه وشوه چې د قندهار او هلمند د ولایتونو د حقوقي مرستو د آمریتونو او د حقوقو د آمریتونو او د دغو ولایتونو د محکمو تر منځ د شته ستونزو د حل کولو په منظور، د عدلیې وزارت مسلکي معین به د هېواد له قاضي القضات سره ملاقات وکړي او ټولي مسئلي او ستونزې به له هغه سره شریکې کړي.
دغه راز پرېکړه وشوه چې د عدلیې وزارت مسلکي معین دې په ولایتونو کې د مامورینو د معاشونو او د ترانسپورت موضوع د عدلیې وزیر صاحب په مشوره له رئیس الوزراء سره شریکه کړي او د هغې په حل کولو کې دې اقدام وکړي.
په دې غونډه کې د عدلیې وزارت مسلکي معین په ټاکلي وخت په خپلو دندو د ټولو رئیسانو او کارکوونکو په حاضر والې باندې ټینګار وکړ او پرېکړه وشوه چې په دفتر کې د رئیسانو د نه حاضر والي او د هغوی د دفترونو د تړلتیا په صورت کې دې غیر حاضر و ګڼل شي او د حاضرۍ خانه دې قید شي.
