د نیمروز ولایت د عدليې نوی رئیس وپېژندل شو او په کار يې پیل وکړ.
د فراه ولایت د عدليې پخوانی رئيس محمد امان هلالي چې په وروستیو کې د نیمروز ولایت د عدليې رئیس په توګه ټاکل شوی دی، د سې شنبې ورځې د غبرګولي په ۲۵ مه د نیمروز د والي مرستیال او سیمه ییزو مسوولانو له خوا د دغه ریاست کارکوونکو ته وروپېژندل شو.
د نیمروز د والي مرستیال عبدالنبي براهوي د ښاغلي هلالي د پېژندنې پر مهال هغه ته د نوي منصب د مبارکۍ ترڅنګ وویل چې اړتیا ده شکایتونو او حقوقي شخړو ته په وخت سره د دغه ریاست له لارې رسیدګي صورت ومومي.
له بلې خوا، د نیمروز ولایت د عدليې ریاست نوي رئيس وویل چې له فساد سره د مبارزې، د قانون د واکمنۍ، شکایتونو ته د رسیدګۍ، حقوقي شخړو او د دغه ریاست د نورو مسوولیتونو په برخو کې به جدي کار وکړي. هغه همداراز د عدليې له ریاست سره د ولایت مقام او نورو سیمه ییزو ادارو د همکارۍ او د دغو بنسټونو ترمنځ د همغږۍ د پیاوړتیا غوښتونکی شو.
د ولایت د مقام مرستیال او نورو مسوولانو له دغه ریاست سره له خپلې همکارۍ څخه ډاډ ورکړ.
