کاپیسا ولایت کې ۶۵۰ جریبه امارتي ځمکه استرداد شوه
د کاپیسا ولایت د ځمکو د غصب د مخنیوي د تخنیکي هیئت ناسته د ۱۴۴۴ هجري قمري کال د شعبان میاشت په ۲۷ نېټه د یکشنبې په ورځ ددغه هیئت د رئیس او غړو په حضور سره جوړه شوه او د راتلونکې میاشت د کاري پلان د ترتیب او د پاتي امارتي ساحو د استرداد په اړه چې په غیر قانوني ډول غصب شوي او تاسیسات پرې جوړ شوي د یوې مناسبې حل لارې موندلو په اړه په کې بحث او د نظرونو تبادله وشوه.
دغي ناسته کې، د راتلونکې میاشت له پاره یو کاري پلان ترتیب شو او پریکړه وشوه چې د روانې اوونۍ د سه شنبې په ورځ ددغه ولایت مرکز کې تپه سولانک او د نجراب ولسوالۍ جنګل باغ کې تثبیت شویو امارتي ساحو ته ولاړ شي او تثبیت شوې امارتي ساحې د ټاکل شوي وخت له پاره په اجاره ورکړي. دغه راز پریکړه وشوه چې پر امارتي ساحو جوړ شوي تاسیسات ویجاړ او د استفادې او ساتنې له پاره یې اړوندو ارګانونو ته تسلیم کړي.
دغه راز په یاده ناسته کې، پریکړه وشوه چې ددغه ولایت په کچه امنیتي ارګانونو ته لیک ورکړل شي ترڅو وروسته له دې په بشپړ جدیت له امارتي ساحو څخه ساتنه وکړي او استرداد شویو ساحو کې د بیاځل تاسیساتو له جوړولو او له غصب څخه مخنیوی وکړي.
دغه هیئت، تېره اوونۍ د امارتي ساحو د استرداد له پاره ددغه ولایت تګاب ولسوالۍ ته ولاړ او د یادې ولسوالۍ له امارتي مقاماتو سره یې وکتل او په امارتي ساحو کې د غصب د مخنیوي او د تاسیساتو جوړولو په اړه یې خبرې وکړې.
یاد شوي هیئت ددغې ولسوالۍ له ځايي مقاماتو سره یوځای د غازي آباد کلي ته ولاړ او د ځمکو د استرداد پروسه یې پیل کړه. یاد شوي هیئت پر غصب شویو ساحو جوړ شوي څلور دیوالۍ ویجاړې کړې او ۶۵۰ جریبه ځمکه یې له غاصبینو څخه آزاده او اړوندو مسوولینو ته یې وسپارله ترڅو د بیاځل غصب څخه یې مخنیوی وشي.
