کابینې د طبابت د اخلاقو مقررې طرحه په پرنسیب کې تصویب کړه
د افغانستان اسلامي جمهوریت د رئیس محمد اشرف غني په مشرۍ د کابینې غونډه دوشنبه ۱۹/۳/۱۳۹۹ د ویدیو کنفرانس له لارې د کابینې د ټولو غړو او دهېواد د والیانو په ګډون په ارګ کې جوړه شوه.
د عدليې وزیر په دې غونډه کې د طبابت د اخلاقو د مقررې طرحه غونډې ته وړاندې کړه او ويې ویل چې دغه طرحه د ناروغانو د حقوقو او خوندیتوب د تامینولو، د روغتیايې پرسونل له مسلکي حقوقو او خوندیتوب څخه ملاتړ، د روغتیايې خدمتونو وړاندې کولو د ښه والي او ډاکترانو د روزنیزو او مسلکي پروګرامونو پراختیا او لوړوالو په موخه ترتیب او پړاوونه تیر شوي دي.
کابینې له هراړخیزو خبرو وروسته، د طبابت د اخلاقو د مقررې طرحه په پرنسیب کې تصویب کړه اوعدليې وزارت يې مؤظف کړ چې ترڅو دغه طرحه دې د کابینې د غړو د اصلاحي نظریو په پام کې نیولو سره د اړوندو بسټونو په ګډون په کمېټه کې تصحیح او نهايې کړي.
په همدې ترتیب، د عدليې وزیر د نرسانو او قابلو د شورا مقررې طرحه غونډې ته وړاندې چې کابینې هغه په پرنسیب کې تصویب کړه او د عدليې وزارت يې مؤظف کړ چې دغه طرحه دې د کابینې د غړو د اصلاحي نظریو په پام کې نیولو سره تصحیح او نهايې کړي.
