په کندز ولایت کې ۲۵ جریبه امارتي ځمکه استرداد شوه
د کندز ولایت د ځمکو د غصب د مخنیوي د تخنیکي هیئت ناسته د صفرالمظفر د میاشتې په ۱۷ نېټې د یکشنبې په ورځ د دغه هیئت د رئیس او غړو په حضور سره جوړه شوه او د ۳ بسوې وقفي ځمکې او د امام صاحب د ولسوالۍ په مجر ساحې کې د ۲۵ جریبه امارتي ځمکې دوسیې په کې بحث او بررسۍ لاندې ونیول شوې.
یاد هیئت د امام صاحب د مجر ساحې ۲۵ جریبه امارتي ځمکه د هغې له متصرف څخه د لیکل شوي اقرارلیک له اخیستلو څخه وروسته هغه استرداد کړه او د خیرآباد ساحې د څړځای د بررسۍ په منظور یو پلاوی تعیین کړ ترڅو ساحه له نږدې بررسي او راپور یې دغه هیئت ته وړاندې کړي.
دغه هيئت د صفرالمظفر د میاشتې په ۱۸ نېټې د دوشنبې په ورځ هم غونډه جوړه کړه او د حضرت امام صاحب د حلقه کول ساحې د ۶۳۵ جریبه ځمکې دوسیه په کې بحث او بررسۍ لاندې ونیول شوه او امارتي تثبیت شوه.
په دغې ناسته کې د کلباد ولسوالۍ د قطغن قرسي، چغر او آلچین ساحو د ۱۶۰ جریبه ځمکې دوسیه هم بررسي شوه او پریکړه وشوه چې یاده دوسیه د څېړنو له بشپړولو څخه وروسته مرکزي کمېسیون ته واستول شي.
یاد شوی هیئت له ناستې څخه وروسته د علي آباد ولسوالۍ چیپ ګذر ساحې ته ولاړ او په دغې ساحې کې ۳۰۰۰ جریبه ځمکه امارتي تثبیت کړه او د کادستر مسؤلینو ته یې هم لارښوونه وکړه چې یاده ساحه مساحت، سکیچ او کروکي کړي او د هغې دوسیه بشپړه کړي.
