په کندز ولایت کې څه باندې د ۷۶ زره جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د جمادي الثاني د میاشتې په ۱۷ نېټه د یکشنبې په ورځ د دغه هیئت د رئیس او غړو په حضور سره جوړه شوه او د دغه ولایت د مرکز او ولسوالیو د ځینو ساحو د امارتي والي او د هغو متصرفینو ته د اجارې ورکړې په برخه کې د مرکزي کمېسیون د ترلاسه شوو پریکړه په اړه په کې بحث او د نظرونو تبادله ترسره شوه.
په یاده ناسته کې، تخنیکي هیئت ۷۶ زره او ۳۲۷ جریبه امارتي ځمکه د یاد ولایت په مرکز او ولسوالیو کې د ځمکو د غصب د مخنیوي کمېسیون د پریکړې په اساس استرداد کړه او د یاد هیئت سکرتریت ته یې لارښوونه وکړه ترڅو د هغو دوسیې د تطبیق په موخه اړوندو مراجعو ته تکثیر کړي.
دغه هیئت د تېرې اوونۍ د پنجشنبې په ورځ هم د پورتنیو دوسیو د تطبیق په اړه د یاد ولایت له مقام او هغو اشخاصو سره چې پر هغو باندې حکم تطبیق کېږي، د یاد ولایت د مقام د غونډو په تالار کې یوه ناسته جوړه کړې وه.
