په ننګرهار ولایت کې د معاملو د لارښوونې درې دفترونه د غیرقانوني فعالیت په دلیل وتړل شول
د ننګرهار ولایت د مقام له لوري موظف شوي هیئت چې د عدليې ریاست او نورو ادارو د استازو په حضور د ربیع الاول میاشتې په ۲۲ نېټه د سه شنبې په ورځ د جلال اباد ښار د معاملو د لارښوونې د دفترونو په بررسۍ کې، ۳ دفترونه د غیر قانوني فعالیت په دلیل وتړل.
د یاد هیئت په ترکیب کې د عدليې ریاست د انسجام امر او د ولایت د مقام، امنیه قوماندانۍ، ښاروالۍ، مستوفیت، ملي امنیت، د امارت د قضایاو استازو او د معاملو د لارښوونو د ټولنې استازي په کې شامل وو او د جلال اباد ښار په اتمه ناحیې کې يې د معاملو د لارښوونې دفترونه کنټرول او بررسي کړل.
دغې بررسۍ کې، د معاملو د لارښوونو له ۱۷ دفترونو څخه لیدنه او کنټرول ترسره شو چې پایله کې يې ۳ دفترونه د موظف هیئت له لوري مهرلاک شول او پاتې نورو دفترونو ته د سرغړونو د حل له پاره لازمې توصيې وشوې.
