په میدان وردک ولایت کې څه باندې ۴۵ جریبه امارتي ځمکه استرداد شوه
د میدان وردک ولایت د ځمکو د غصب د مخنیوي له تخنیکي هیئت څخه یو ټیم د یاد ولایت د عدلیې رئیس مطیع الحق عثمان په مشرۍ د ربیع الاول د میاشتې په ۱۹ نېټې د چهارشنبې په ورځ د یاد ولایت چک ولسوالۍ ته سفر وکړ او د یادې ولسوالۍ له ولسوال، امنیه قوماندان او سیمه ییزو مسؤلینو سره یې وکتل.
په دغې کتنه کې د یادې ولسوالۍ د برېښنا فابریکې د بند د کاسې د غصب شویو ځمکو په تړاو بحث او خبرې وشوې.
وروسته یاد ټیم د یادې ولسوال د برېښنا فابریکې د بند کاسې ساحې ته ولاړ او د یادې ساحې له متصرفینو سره یې وکتل.
هیئت د ساحې له بررسۍ څخه وروسته ۴۵ جریبه او ۴ بسوې او ۱۱ بسواسې ځمکه په یادې ساحې کې تثبیت کړه او مربوطه ادارې ته استرداد کړه او د یادې ځمکې متصرفینو ته ۲۰ ورځې وخت ورکړ ترڅو خپلې ټولې کرکیلې د بند له کاسې څخه لرې کړي.
