په غور ولایت کې د ۱۱ جریبه ځمکې تثبیت او استرداد
د غور ولایت د ځمکو د غصب د مخنیوي د تخنیکي هیئت ناسته د صفرالمظفر د میاشتې په ۲۶ نېټې د سه شنبې په ورځ د غور ولایت د والي او د دغه ولایت د تخنیکي هیئت د رئیس او غړو په حضور سره جوړه شوه او په هغې کې تخنیکي هیئت خپلې ستونزې او ننګوونې د یاد ولایت له والي سره شریکې کړې.
په دغې ناسته کې، د غور ولایت والي د یاد ولایت له تخنیکي هیئت څخه خپل ملاتړ اعلام کړ او له دغه هیئت سره یې د هر راز همکارۍ ژمنه وکړه. وروسته د یاد ولایت د یو تن اوسیدونکې تر ادعا لاندې د ځمکې په اړه تصمیم ونیول شو چې د عامه څړځای او کرنیزو ساحو مساحت او حدود له یو بل څخه په کې تثبیت شي.
دغه راز په یاده ناسته کې د دغه ولایت د مرکز په نرکوه کې د ۱۱ جریبه ځمکې په اړه چې د دغه هیئت د مسلکي ټیم له لوري تثبیت او جي پي اس شوې وه، بحث وشو او د هغې راپور د تائید وړ وګرځید او له بل لوري د یوې بلې نمرې د ځمکې له متصرف څخه هم اصولي سندونه او مدارک وغوښتل شول.
