په بادغیس ولایت کې ۵۰۰ جریبه امارتي ځمکه استرداد شوه
د بادغیس ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د صفرالمظفر د میاشتې په ۱۱ نېټه د دوشنبې په ورځ د دغه هيئت د رئیس او غړو په حضور سره جوړه شوه او د تخنیکي هیئت له خوا وړاندې شوي سندونه او مدارک په کې بحث او بررسۍ لاندې ونیول شول.
په دغې ناسته کې د فاریاب ولایت د چهل ګزي ولسوالۍ او د بادغیس ولایت د غورماچ ولسوالۍ د څو تنو اوسیدونکو تر ادعا لاندې د شور سرخ ساحې ۵۰۰ جریبه ځمکه بحث او بررسۍ لاندې ونیول شوه او یادې ځمکې په امارتي توب د دعوا د لورو له اقرار څخه وروسته له هغوی څخه ژمنه واخیستل شوه او یاده شوې ځمکه اړوندې ادارې ته استرداد شوه.
په دغې ناسته کې یو شمېر نورې دوسیې هم بحث او بررسۍ لاندې ونیول شوې او په اړه یې لازم تصمیمونه ونیول شول. وروسته یاد تخنیکي هیئت د خلیفه (علیه رحمه) زیارت څخه لیدنه وکړه او له یو شمېر افرادو او اشخاصو څخه چې د زیارت ځمکې یې غصب کړي، شرعي سندونه او مدارک وغوښتل.
