پروان ولایت کې څه باندې ۳۲۰۰۰ جریبه ځمکه تثبیت او تشخیص شوې ده
د پروان ولایت د ځمکو د غصب د مخنیوي تخنیکي هیئت، د ذوالقعدې د میاشت په ۱۶ نېټه د دوشنبې په ورځ د هیئت د فعالیتونو راپور ورکولو ناسته د دغه ولایت له والي سره جوړه کړه.
په دغې ناسته کې چې د پروان والي په مشرۍ جوړه شوه، تخنیکي هیئت خپل کاري راپور نوموړي ته وړاندې کړ. د وړاندې شوي راپور پر اساس، د دغه هیئت د کار له پیل څخه تر دې دمه ۳۲۲۴۸.۳۵۵ جریبه ځمکه تثبیت او تشخیص شوې او ۱۶۱.۰۷۷ جریب نور ځمکه هم استرداد شوې ده.
یاد شوي هیئت په بګرام ولسوالۍ، شیخ علي ولسوالۍ او د دغه ولایت د مرکز اړوند په احمد شاه مسعود ښارګوټي کې اجراآت او بررسۍ ترسره کړي او د اشخاصو له خوا د امارتي ځمکو ناقانونه پلورل یې هم په ګوته کړي دي او په ځینو ساحو کې ناقانونه تاسیسات يې هم ویجاړ کړي دي.
په دغې ناسته کې، تخنیکي هیئت د ځمکو د غصب مخنیوي په برخه کې پر لازیاتو هڅو ټینګار وکړ او د ناستې په پای کې د پروان والي له دغه هیئت سره د هر اړخیزې همکارۍ ژمنه وکړه.
