ننګرهار ولایت ته د ځمکو د غصب د مخنیوي کمېسیون د مشرتابه هیئت سفر
د ځمکو د غصب د مخنیوي او د غصب شویو ځمکو د استرداد کمېسیون د مشرتابه هیئت د عدلیې وزارت د سرپرست شیخ الحدیث مولوي عبدالحکیم شرعي او د کرنې او اوبو لګولو، ښارجوړولو وزارتونو د سرپرستانو، لوی څارنوالۍ، د چارو د ادارې د لوی رئيس، د سترې محکمې او ددغه کمېسیون د ځانګړې محکمې د استازو په غړیتوب، د ۱۴۴۴ کال د شعبان میاشت په ۱۵ نېټه د سه شنبې په ورځ د غصب شویو ځمکو د استرداد په منظور ننګرهار ولایت ته سفر وکړ.
د یاد کمېسیون مشرتابه، د شعبان میاشت په ۱۶ نېټه نن چهارشنبې د سهار په ۹ بجو ددغه ولایت د تخنیکي هیئت په ملتیا خپل کار د غصب شویو ځمکو د استرداد په موخه عملاً پیل کړ. ټاکل شوې، یاد کمېسیون د ننګرهار ولایت د سیمه ییزو مسوولینو په همغږۍ سره د غصب شویو ځمکو د استرداد په برخه کې چټک او قاطع اقدامات ترسره کړي.
د یاد کمېسیون د مشرتابه هیئت، د ننګرهار ولایت د علماو د شورا له غړو، د استخباراتو رئيس، امنیه قوماندان، او ددغه ولایت له نورو ولایتي مقاماتو سره وکتل او ددغه کمېسیون د فعالیتونو او موخوو او د عالیقدر امیرالمومنین حفظه الله د فرمان په اړه هغوی ته معلومات وړاندې کړل. یاد هیئت، له ولایتي مسوولینو او ددغه ولایت د علماو له شورا څخه له دغه کمېسیون سره د هراړخیزې همکارۍ غوښتنه وکړه.
په دغې ناسته کې، د علماو شورا او ددغه ولایت ولایتي مسوولینو له یاد هیئت سره د هر ډول همکارۍ ډاډ ورکړ.
د دولتزیو قوم مشرانو او مخورو د ځمکو د غصب د مخنیوي کمېسیون له مشرتابه سره، د ننګرهار ولایت د مرستیال او ددغه ولایت د تخنیکي هیئت په حضور کې وکتل.
په دغې ناسته کې، د ځمکو د غصب د مخنیوي کمېسیون مشرتابه د هغو ښارګوټو په اړه چې دولتزي قوم په غیرقانوني ډول پر امارتي ځمکو جوړ کړي، له هغوی سره خبرې وکړې.
د یاد قوم مشرانو هم خپل غوښتنې او وړاندیزونه ددغه کمېسیون له مشرتابه سره شریک کړل او د خپلو غوښتنو له پاره د رسیدګۍ غوښتونکي شول.
