میدان وردک ولایت کې د معاملو د لارښوونې له دفترونو څخه نظارت وشو
یو ګډ پلاوي د میدان وردک ولایت د عدليې رئیس مولوي مطیع الحق عثمان په مشرۍ او د انسجام مدیریت، مستوفیت، د امارت د قضایاو آمریت او د ښاروالۍ ریاست د استازو په غړیتوب د شعبان میاشت په ۱ نېټه د سه شنبې په ورځ ددغه ولایت په مرکز میدان ښار کې د معاملو د لارښوونې له دفترونو څخه نظارت وکړ.
یاد هیئت، دغه ښار کې د معاملو د لارښوونې د ۹ دفترونو له سندونو او سوابقو څخه لیدنه او نظارت وکړ او د معاملو د لارښوونو یو شمېر مسوولینو ته د هغوی په کارونو کې د ځینو نیمګړتیاو په علت لازمې سپارښتنې او لارښوونې وکړې او هغوی يې خپلو نیمګړتیاو ته متوجې کړل.
یاد هیئت د معاملو د لارښوونو له مسوولینو څخه وغوښتل چې خپل کارونه له اسلامي شریعت او د هیواد له نافذ شویو قوانینو سره سم ترسره کړي.
د معاملو د دفترونو مسوولینو له عدليې ریاست څخه ددغو دفترونو له کارونو څخه د نظارت په منظور مننه او قدرداني وکړه او ژمنه يې وکړه چې په راتلونکي کې به خپل کارونه له شریعت او هیواد کې د نافذ شویو قوانینو سره سم ترسره کوي او خپل کارونو کې به سهل انګاري و نه کړي.
