له مرکزي رئیسانو سره د عدلیې وزیر ناسته
د افغانستان اسلامي امارت د عدلیې وزارت سرپرست شیخ الحدیث مولوي صاحب عبدالحکیم شرعي، د ۱۴۰۰ د کب په ۱۰ د سه شنبې په ورځ د دې وزارت له یو شمېر مرکزي رئیسانو سره وکتل او خبرې اترې یې ورسره وکړې.
په دې ناسته کې د هغو مجاهدینو د معاشاتو په اړه چې په دې وزارت کې نوی مقرر شوي او همداراز یې د مالي مسایلو او کاري نورو موضوعاتو په اړه بحث وکړ او نظرونه یې سره تبادله کړل.
د عدلیې وزارت سرپرست په دې ناسته کې د دې وزارت رئیسانو ته لارښوونه وکړه تر څو د نویو مقرر شویو کارکوونکو معاشات د منظورۍ له نېټې څخه ورکړي. همداراز په دې ناسته کې پرېکړه وشوه څو یو پلاوی د خوست، پکتیا، پکتیکا، لوګر، میدان وردګ او غزني ولایتونو ته سفر وکړي او د دغو ولایتونو د عدلیې ریاستونه له نږدې وګوري او کارونه یې وڅېړي او مشکلات یې معلوم کړي اود حل دپاره یې لازم تصمیمات ونیول شي.
د یاد پلاوي مشري به د دې وزارت د مالي او اداري چارو رئیس محترم مفتي صاحب فضل هادي په غاړه وي او د امارت د قضایاوو، حقوقو، انسجام، حقوقي مرستو او د کورنۍ پلټنې له ریاستونو څخه یو یو تن به یې غړي وي.
