لغمان ولایت کې نږدې ۸۶ جریبه امارتي ځمکه د غاصبانو له منګلو آزاده شوه
د لغمان ولایت د ځمکې د غصب د مخنیوي تخنیکي هیئت ددغه ولایت قرغه يي ولسوالۍ ته ولاړ او ۸۶ جریبه امارتي ځمکه يې ددغې ولسوالۍ په زنګوري سیمه کې د غاصبانو له منګولو څخه آزاده کړه او د هغې اجاره دار ته يې وسپارله.
یاده شوې امارتي ځمکه په ۱۳۹۹ کال کې یو شخص ته په اجاره ورکړل شوې وه خو له څه مودې وروسته د زورواکو لخوا غصب او غاصبینو یې په محکمه کې بې اساسه دعوا پیل کړې وه.
اړوند محکمې ددعوا له دقیقې بررسۍ څخه وروسته د اسلامي امارت په ګټه قرار صادر کړ ترڅو ځمکه د غاصبینو له تصرف څخه بیاځلې آزاده او د اسلامي امارت په ولکه کې شي.
تخنیکي هیئت هم ساحې ته ولاړ او قرار یې تطبیق کړ او یاده شوې ۸۶ جریبه ځمکه يې پخواني اجاره دار ته وسپارله.
