د یوې اتحادیې د جوړولو په پار د خيريه بنسټونو او عدلیې وزارت ترمنځ مشورتي ناسته جوړیدل
د عدلیې وزارت د خيريه بنسټونو ترمنځ د یوې اتحادیې د جوړلو په موخه د یاد وزارت په مقرکې مشورتي ناسته جوړه کړه.
په دې مشورتې غونډه کې چې د شعبان د مياشتې په ۲۰ مه نېټه د شنبې په ورځ جوړه شوه د عدلیې وزارت مالي او اداري معين مولوي عبدالغني فايق، د انسجام لوی رئيس مولوي حافظ عبدالصمد عمري او په دې وزارت کې د ثبت شویو لسګونو خيريه بنسټونو رئیسانو او استازو ګډون کړی وو.
د عدلیې وزارت مالي او اداري معين په دې ناسته کې په خپلو خبرو کې وویل چې، د افغانستان ولس ته په تېرو څلوېښت کلنو کې زیات زيانونه رسیدلي دي او ټینګار یې وکړ چې خيريه بنسټونه دې د دغو خلکو لپاره د کمک په برخه کې فعاليت وکړي.
دغه راز نوموړي د خيریه مرستو د انسجام په موخه د يوې اتحادیې رامنځته کول مهم وباله او د بنسټونو له مسؤولینو څخه یې وغوښتل چې په دې برخه کې کار وکړي.
دغه راز د عدلیې وزارت د انسجام عمومي رئيس، په یاده ناسته کې په خپلو خبرو کې وويل، خیریه بنسټونه دې بنسټیزو کارونو ته ډېره پاملرنه وکړي تر څو د هېواد د پرمختګ لامل شي.
په ورته مهال د خيريه بنسټونو استازو او رئيسانو د خيريه بنسټونو په اړه د جوړې شوې کړنلارې، د اتحادیې رامنځته کولو او د غیر قانوني بنسټونو د فعاليت د مخنیوي په اړه خبرې وکړې او خپل نظریات یې بیان کړل.
د ناستې په پای کې پرېکړه وشوه چې، د اتحادیې جوړولو په موخه دې یوه کمېټه کار وکړي او پایلې یې له وزارت سره شريکې شي.
