د کنړ ولایت له یو شمېر اوسیدونکو سره د یاد ولایت د ځمکو د غصب د مخنیوي د تخنیکي هیئت کتنه
د کنړ ولایت د ځمکو د غصب د مخنیوي د تخنیکي هیئت ناسته، د ذوالقعدې د میاشتې په ۲۵ نېته د چهارشنبې په ورځ د دغه هیئت د رئیس او غړو په حضور سره جوړه شوه او په کې یاد هیئت د خاص کنړ ولسوالۍ د شالې ولي ساحې او د سرکاڼو ولسوالۍ دونهي ساحې له استازو سره وکتل او هغوی هم خپل خبرې او غوښتنې له هیئت سره مطرح کړې.
په دغې ناسته کې، د شالې ولي ساحې اوسیدونکو وویل چې د شالې میدان زموږ او زموږ د قبایلو ملکیت دی او که په اجاره ورکول کیږي، باید د هغو یو شمېر خکلو ته چې پاکستان کې استوګنه لري او د استوګنې له پاره کور نه لري، وویشل شي.
تخنیکي هیئت یاده قطعه امارتي وبلله او یې ویل چې د امیرالمؤمنین حفظه الله له اجازې پرته د هغې د ویشلو اجازه نه لري، هیئت ټینګار وکړ چې هیڅ یو امارتي مسؤل پر امارتي ملکیتونو غیر اصولي معامله او اجراآت نه شي ترسره کولی.
په دغې ناسته کې، د سرکاڼو ولسوالۍ د دونهي یو شمېر اوسیدونکو هم وویل چې خپل میراثي ځمکې یې پلورلي دي خو اوس پر ځمکو د پیرودونکو د کار مخنیوی کیږي. هیئت دغې ساحې ته د هغوی د سندونو د تطبیق او د امارتي او شخصي ځمکو ترمنځ د حدفاصل تعیین له پاره د سفر په اړه لازم تصمیم ونیو ترڅو د یادو ځمکو حدود څرګند او د هغې ستونزه حل شي.
