د کنړ ولایت د عدلیې ریاست پلاوي د سرکاڼو ولسوالۍ له امارتي ملکیتونو څخه لیدنه وکړه
د کنړ ولایت د عدليې رییس د صفرالمظفر میاشتې په ۲۳ نېټه د دوشنبې په ورځ د دغه ریاست د پلاوي په مشرۍ د کنړ ولایت د سرکاڼو ولسوالۍ له امارتي ملکیتونو څخه؛ چې امارتي ملکیتونه یې پخوا د امارت د قضایاو د آمریت په هڅو تثبیت شوي وو، لیدنه وکړه.
یاد پلاوي چې د عدليې ریاست د بېلابېلو برخو آمرین هم په کې شامل وو، ولسوالۍ کې له هغو ملکیتونو څخه هم لیدنه وکړه چې په دې وروستیو کې غصب شوي وو او مسوولین یې ورته متوجه کړل.
د کنړ ولایت د عدلیې رییس ټینګار وکړ چې امارتي ملکیتونه وروسته له دې باید په جدي توګه خوندي شي او د هغو د غصب مخه دې ونیول شي.
یاد پلاوي د سرکاڼو ولسوالۍ له ولسوال سره هم وکتل او په دې کتنه کې د دولتي ځمکو د غصب د مخنیوي په منظور د لاهمغږۍ په اړه ټینګار وشو.
