د کندهار زون ولایتونو د عدلیې ریاستونو مسلکي غړو لپاره د شپږ ورځني زده کړییز سیمینار جوړول
د عدلیې وزارت د بشري سرچینو ریاست د زده کړو او ظرفیت لوړولو آمریت، د ربیع الاول د میاشتې په ۲۹ نېټې د شنبې په ورځ د کندهار زون ولایتونو د عدلیې ریاستونو مسلکي غړو لپاره شپږ ورځنی زده کړییز سیمینار د کندهار ولایت په عدلیې ریاست کې جوړ کړ.
په دغه سیمینار کې چې د امارت د قضایاو د مسلکي غړو د زدکړو تر سرلیک لاندې جوړ شو د کندهار، ارزګان، هلمند، زابل او دایکندي ولایتونو د عدليې ریاستونو ۲۵ تنو مسلکي غړو برخه واخیسته او د ځمکو له غصب سره د مبارزې د حل لارو، د ځمکو د غصب د مخنیوي مقررې، دعوا او د هغې ډولونو، اداري مراسلاتو او د پلان جوړونې په اړه لازمې زده کړې ترسره کوي.
د یاد سیمینار په پرانیسته کې د کندهار ولایت عدليې رئیس الحاج مولوي فضل الحق شاکر د عدلیې وزارت له مقام او د دغه سیمینار له ترسره کونکو څخه مننه او قدرداني څرګنده کړه او په راتلونکي کې هم د دغه راز برنامو جوړولو غوښتنه وکړه.
د عدلیې وزارت د بشري سرچینو ریاست د زده کړو او ظرفیت لوړولو آمریت د یاد وزارت د کارمندانو د کاري ظرفیت لوړولو په منظور وخت په وخت دغه ډول برنامې جوړوي او د یاد وزارت د کارمندانو د ظرفیت لوړولو په موخه هلې ځلې کوي.
