د کندز ولایت د ځمکو د غصب د مخنیوي د تخنیکي هیئت د ناستې جوړیدل
د کندز ولایت د ځمکو د غصب د مخنیوي د تخنیکي هیئت ناسته د ذوالقعدې میاشت په ۱ نېټه د یکشنبې په ورځ د هیئت د سرپرست او غړو په حضور سره جوړه شوه او د امام صاحب په برزنګي کې د ۷ جریبه ځمکې دوسیه په کې بررسي شوه. یاد شوي هیئت د یادې ځمکې په امارتي توب د متصرفینو د اقرار او اعتراف په پام کې نیولو سره، هغه استرداد کړه او پریکړه یې وکړه چې یاده ځمکه له اصولو سره سم په اجاره ورکړل شي.
دغه راز یاد هیئت د علي آباد او امام صاحب ولسوالیو کې د ۹۶ جریبه ځمکې اړوند دوسیې بررسي کړې. یاده ساحه د دغه هیئت لخوا امارتي تثبیت شوه او د یو لړ څېړنو د نه شتون له کبله یې استرداد وځنډول شو او په اړه یې د څېړنو ترسره کولو په اړه لارښوونه ورکړل شوه.
په دغې ناسته کې، خان آباد ولسوالۍ کې د ۷ جریبه نورې ځمکې دوسیه هم بررسي شوه او هیئت مشخصه کړه چې د یادې ځمکې بر سیره خلکو د سیند په غاړه هم کورونه جوړ کړي دي. پریکړه وشوه چې هیئت په راتلونکو ورځو کې ساحې ته ولاړ شي او هغه بررسي کړي.
