د کاپیسا ولایت د نجراب ولسوالۍ د دارالوکالو، د معاملاتو لارښوونو او د عریضه لیکونکو بررسي او نظارت
د کاپیسا ولایت د عدليې رئیس قاري شکرالله احمد او د یاد ریاست نظارتي پلاوي د جمادي الثاني د میاشتې په ۵ نېټه د سه شنبې په ورځ د یاد ولایت نجراب ولسوالۍ ته سفر وکړ او په دې ولسوالۍ کې له یو شمېر دارالوکالو، د معاملاتو لارښوونو او عریضه لیکونکو څخه بررسي او څارنه ترسره کړه.
د کاپیسا د عدليې رئیس او د یاد ریاست نظارتي پلاوي، لومړی د نجراب ولسوالۍ له ولسوال مولوي عطاالله، امنیه قوماندان او د یادې ولسوالۍ له نورو سیمه ییزو مسؤولینو سره وکتل او د هغوی په همغږۍ یې له یو شمېر دارالوکالو، د معاملاتو لارښوونو او عریضه لیکونکو څخه بررسي او څارنه ترسره کړه.
یاد هیئت د بررسۍ په ترڅ کې، ۳ دارالوکالې چې په ناقانونه ډول او له جواز څخه پرته فعالیت درلود، وپېژندلې او له یادو دفترونو یې ترلاسه شوي سندونه ضبط کړل او د هغوی دفترونه یې مهرلاک او وتړل. دغه هیئت یادو شوو سرغړونکو ته توصیې او لازمې لارښوونې وکړې او له هغوی څخه یې لیکل شوې ژمنې واخیستې.
